يــومــيات طـالـب مجـتـهـد
يوم يكره كل الناس , يوم يكره كل البشر , الا هو اول ايام الاسبوع .....!!! ؟؟؟؟
واحد نايم في امان الله ولا احلى من كذا؟؟ ... الا تجيه الشغالة تبغى تقومه علشان يروح المدرسة ... مافي امل . تحاول فيه وهو ملتف حول اللحاف تقول كفن .. مافي امل .. فطفش منها .. فرمي عليها البطانية وطردها ..ورجع نام ... الا شوي يسمع صوت ابوه جاي من بعيد ... وهو عارف ابوه مايتفاهم .. قام من الفراش . طبعا نص ساعة علشان يغسل ويلبس ويكوي الشماغ وربع ساعة يتعطر تقول رايح عرس والثوب طويل تقول شغال بلدية تنظيف يعني مثل ما انتو عارفين , طبعا الساعة صارت 7.15 يعني فاته الطابور وشوي من الحصة الاولي . لكن عادي ؟ نسيت اقول اسم صاحبنا .. اسمه مبارك . ويدلعونه ابوحرش " مرعب النفوس " . ويخش المدرسة . يشوفه الوكيل يقوله : ها مبارك زي العادة ما تبطل , يقوله : والله معليش راحت عليه نومه امس طول اليوم كنت اذاكر , الوكيل : صدقتك شكلك سهران قاعد تلعب سوني , وش رايك لو اجيب لك دفتر تحضير المدرسين توقع زينا . مبارك يقوله : ياليت , اقصد مافي داعي . المهم يوقفه الوكيل زي العادة حصة الاولي . ومشاه للفصل حقة اللي هو 2 / 4 علمي "الفقه علمي" ـ ودخل الفصل , طبعا الفصل تخشة كنك خاش حارة ضيقة وزحمه وكتابات على الجدران , مكتوب في جدران الفصل ابوسراب , واللي كاتب اموت على الفياجرا... واللي كاتب ام عطيات اشين واحدة ... واللي يسب المدرس ... ولا الطلاب واحد يشرب شاي ... واللي يلعبون ورق... واللي قاعدين في الزاوية طايحين طق وطبول وواحد يشكشك ... تقول "شاكيرا" ولا الدوافير مساكين العالم اللي ورا يرجمونهم تقول عليهم يهود يعني فوضى . طبعا مبارك خش الفصل ومكانه المعهود اللي له سنتين ما غيره في الزاويه جنب خويه سعد الملقب "بالشكشوكة" .. ويكلمه صديقه سعد: وينك تاخرت , شكلك تدام في كبينة . يرد عليه مبارك : ياليت بس فاتكم فلم امس والله مو طبيعي . حق واحد اسود بس خطير قاعد طول اليوم سهران عليه . يقوله سعد : انت اللي فاتك , الحصة الاولي جانا مدرس جديد حق الكيمياء شخصية , بس وين جنناه شوي ويشق شعره مبارك يقوله : والله , اجل فاتني . شوي الا يدخل مدرس الانجليزي اسمه : محمدين عثمان , سوداني دخل عليهم والعمامة تقول الفيصلية ولا بس ثوب يكفي 20 نفر . اول ما يدخل الفصل يمسح الصبورة ويكتب التاريخ ما يكلم احد . طبعا الفصل سكتو شوي . "بس شوي" , ما يمديه المدرس يلتفت للصبورة الا تجيه طبشورة وتضرب رقبته . طبعا زعل محمدين , قالهم المدرس : مين الوسخ دا اللي رمى الطبشورة... طبعا الفصل ساكتين خايفين يتكلمو . قالهم محمدين : والله لو ماتكلمتو بخصم 5 درجات من كـل طـالب , طبعا الدوافير خافو اهم شي الدرجات
و شوي الا واحد منهم تكلم : اللي عمل كدا هو" سعدون" . سـعــدون وقف طبعا مسوي زعلان .... عاد يلقـبـونه
" ابو حتوش" وقال : تستهبل يا وجه الطماطم انا رجمت اصلا انا كنت نايم , جاك المدرس قاله : وكمان نايم في الحصة وتقل ادبك , اقوليك اطلع بره . ويقوله سعدون : والله ماسويت شي . وبرضو.. طرده المدرس . سعدون يقول للمصري : اوريك يا الدافور اذا ماخليت وجهك كفته مااصير ابو حتوش . وصاحبنا مبارك طبعا ولا موجود في الدنيا ليش !! قاعد يحل واجب القواعد ومافي الا نقش , رن الجرس صارت الفسحة .... نزلو الفسحة طبعا مبارك دايم ينزل متاخر ويتمشى في الاسياب ويسولف مع خواينه وبعدين يروح الساحة ... طبعا عنده واحد دايم يجيبله الفطور كل يوم ... "يعنى تابع" , طبعا تنزل الساحة زحمة طوابير في المقـصف والمصايريا يلعبون في الساحة بالقواطي ... والخوال قاعدين في الزاوية يدخنون.... ومبارك والشباب فارشين سجادة في الارض ومافي الا ضحك وترقيه على اللي رايح واللي جاي ... طبعا مين هما .. مبارك ... وسعد ... وخميس طبعا يناودنه تفاحة . لان خدوده حمرا ... وراشد هذا الرمانسي حقهم ... ينادونه "ابو ريم" . مبارك يقولهم : فاتكم امس فلم موطبيعي حق واحد اسود .. يقوله خميس : ياخي انت قديم مغبر .. جابوه خمسين مرة ... يقوله مبارك : وش عرفك بالافلام انت حدك تروح تتفرج "بوكيمون" ولا "السنافر" .. والشباب مافي الا ضحك .. راشد يقول لـ سعد : ياخي مواعد خويتي اليوم بس ماعندي سيارة ها كيف .. اقدر اخذ سيارتك ... يقوله سعد : ولا ماادري بس بحاول , لان عندي مبارة اليوم بس بشوف . شوي الا رنت الفسحة علشان الحصة الرابعة ... وجاهم مدرس ماسك عصا .. يبغى يقومهم وجه كبير ولابس نظارة كبيرة تقول "ستالايت" الشباب يتسحبون شوي .. شوي .. بس يبغون يقهرونه .. يقول سعد : وش يبى هذا لو فاتح له محل فول وقلابة ابركله .. يقول مبارك : وتخب عليه بعد ... حده مسوايك ويبيع في قصر افراح .. طلعو الفصل وكلش جنان زي العادة ... والطق شغال وترجيم مويه في المراوح .. واللي يكتب لك في الصبورة ... 2pac .. واللي يكتب .. خالد عبدالرحمن .. واللي يكتب شعر ... تقول صبورة بيتهم . طبعا ريحت الفصل كلها ثوم وطعمية ... وااااااخر ..... ؟؟؟ ولا عطر "روما" دخل المدرس مصري اسمه مدحت خش يقول : خلاص ياشباب عندنا دي لواقتي حصة بطلو جنان والا حخرب بيتكم .. واحد من العيال قال : اف مو عاقل المقاول .. سمعه المصري فراح عنده وقاله : مقاول .. دي لواقتي حـ بني شوارع في وشك وطرده , يشرح المدرس و 70 % مو موجودين في الفصل يسولفون .. 10 % نايمين حاطين السجادة في الطاولة .. بس ناقصهم مخدة .. 5 % يحلون واجبات في الحصة .. والباقي متابعين مع المدرس بدون نفس L ....
طبعا لما بقى من الحصة ربع ساعة ... الا جاك المدرس قالهم بسويلكم اختبار ... الشباب زعلو ... كيف الكلام هذا ما يصير , المدرس اصر ... ووزع الورق ... ووخر الماصات ... طبعا مبارك زعلان ... موعلشان ماذاكر ... لا.؟؟
زعلان لان مامداه يحط براشيم علشان يغش ... ووزع الورق المدرس ... طبعا الوضع صار صعب لازم درجات ... صارو الشباب يدورو فرصة علشان يحلو ... فما يمديه المدرس يلتفت الا توزيع الورق يشتغل ... ونقش من اللي جنبك ... واللي يطلع الكتاب بكبره ... واللي كتب على ثيابه ... يعني ما خلو شي ... والمدرس المسكين قالك مسوي فاهم ماسك الشباب ... وهما اللعن منه!! ... مبارك صاحبنا مداه يخلص بدري ... طبعا مو من خويه سعد لان ذاك ماعنده سالفة ... من اللي قدامه اسمه "حسني" .., عاد هذا الثالث على الفصل ... وهو الامداد الجوي والبري والبحري حق مبارك ... .يعني الشباب يعجبونك ... شغالين قصف ... !! رنه الحصة وبدا المدرس يسحب الورق والشباب مسوين زعلانين ما يبغون يسلمون الورق .... وهما مخلصين من زمان .... شوي تجي الحصة الخامسة
وطلع مدرس الادب غايب .. ليش لان الشباب طقو قبلها بيوم وخايف يجي ... وقف العريف وبدا يكتب اسماء المشاغبين طبعا المساكين بس اما الحونشية هذولي عندهم واسطة .... صار في الفصل انواع الحب والعلوك والحلويات وجميع انواع المشروبات الغازية ... كل شي ... بس اطلب .. حتي في " منيو" عندهم قائمة طلبات حتى لو تبغي توصيل سريع موجود ... حتى توصيل منازل عندهم ... يعني فصل متكامل .. اللي هو 2 / 4 علمي ؟؟؟ J
مبارك يقول للشباب : اسمعوني انا طفشت ... بنحاش اليوم .. وبروح الشيشة .. الشباب قالو: معاك يابوحرش
نزلو شوي .. شوي .. بدون ما احد يحس لين وصلو باب الخروج عند الفراش ينادونه "ابو سعد " قاله مبارك
: اخبارك ابو سعد وشلون ام العيال .. يقوله : بخير الله يصلحك .. يقوله مبارك : ياخي طفشنا من ذي المدرسة البايخة ... نبي نشم هواء .. قاله : مالك امل , يقوله : ليش ..!! يرد عليه : صعبة مشددين ها اليومين لان يقولون في موجه جاي .. يقوله مبارك : وين مادريت هون , توني سامع المدير يكلمه , يمكن ما يجي الا بعد اسبوع ..
طبعا صاحبنا نصاب بس يبي يطلع .. قاله سعد : طلعنا وما عليك اللي تبيه احنا حاضرين فيه .. يحاولون ... يحاولون .. لين اقنعوه .. وطلعو من المدرسة ... وركبو سيارة قديمة شوي ... يعني تمشي الحال ... ما مداهم حركو شوي الا لقو الوكيل قدامهم ومعاه الموجه اللي جاي من الوزارة J !! ... ماصدقو المنظر .. فصار ما يمديهم الا ينحاشو وحركو سيارتهم .. والوكيل ينادي فيهم .. وين مافي امل يوقفون ... وركب الوكيل سيارته ... ووراهم ... من شارع لشارع .... ومن حارة لحارة ... لكن تخيل وش صار .... ؟؟؟!!!
طلع عليهم ليموزين كان مسرع من الجهه اليمين ... وضرب فيهم ضربة قوية فرت السيارة لفتين ... وضربت في شجرًة ووقفت ... الوكيل ما صدق المنظر ... اتصل بالشرطة .. والاسعاف ... لكنهم دايم يوصلون متاخرين ...!!!
حاول الوكيل يفتح سيارتهم لكن ماقدر ... شافهم كلهم مغمي عليهم وبعضهم ... في وجوهم دم ... مرت دقائق ... وساعات ... ووصلت الامدادات ... لكن الوكيل مو عارف مصيرهم ... هل هما ميتين ولا لا هذا السؤال .. ؟؟؟!!!
* كانت فكرتى في القصة اني اكون قربت من واقع يمكن يكون حقيقي ... لان كثير من الشباب يحس ان من الذكاء لما يستغفل مدرس ... لما يشاغب في الحصة يبين للطلاب انو واحد مميز .. او انه واحد له شخصيته ... يحاول يتميز عن كل الطلاب ... وهذا الشي له جانب ايجابي .. وله جانب سلبي لكن هو الشي الحاصل دايماً... بس السبب اللي خلا الطلاب يتجو هذا الاتجاه هو اسلوب المدرسين بالذات "الجدد" ... اللي ما يحاول يقرب من الطالب ... ما يحاول يسمعه ... مايحاول يساعده ... ما يحاول يكون صديق له ... بس يحاول يسيطر علشان يبين انه متمكن .. يفرض كلامه ... يهين الطالب يبغي الطالب ينصاع لامره مثل التابع ... يسمع الكلام وبس ... يعني "لا شرح زي العالم ومسوي فاهم" قليل من المدرسين اللي خلو اثر طيب عند الطلاب ... قليل منهم ... !!! ... لان الطالب ممكن بكلمة تكسبة ... وممكن بكلمة تخسرة او حتى بتصرف ....؟؟؟ !!!
المكان احدى المستشفيات ... وفي زحمه شوي ... طبعا الادارة المدرسية كلها متواجدة .. مع اولياء الامور .. والكل خايف ما وده يسمع ... شي ممكن يكون حزن على اولياء الامور والمدرسة ... ؟؟!!
فتح عيونه مبارك ... ولقى نفسة ممد على السرير وحوله مجموعة من الممرضين .... ولقى رجله مجبسة والدم مليان ملابسة ... وحاس بصداع .... شوي يبدا يفكر ايش اللي صار ... مو مستوعب الموضوع ... مو مصدق ..
شوي بدا يفكر في اصحابه .... ايش جاهم ... خاف لا يكونو ماتو ... يبغي يكلم الدكتور مو قادر ... موقادر يتكلم من اثر المخدر اللي اخذه وبعدين رجع لغيبوبته ... لكن...!!! فجـــأة .. صار شي غريب .. تخيلو..؟؟!!!
قام مبارك مرة ثانية بس لقى نفسة ممدد في السرير ... والخدامة قاعدة تحاول فيه علشان تقومه .. J ؟..!!!
قام وهو مفزوع وهو حاس انه مو قادر يتنفس ... يشوف نفسه في المرايه ... مو مصدق يحسس جسمه .. يحسس رجله ... مافيه شي .. طلع كل شي كان حلم مزعج ... J !! .. حلم كان اقرب من الحقيقة ... قريب جدا .. ؟؟
قام مبارك ... ومسح وجه ... وقعد لوحده وهو يفكر ... كيف انا عايش حياتي ... هل انا سيء للدرجه هذي ... فراح غير هدومه ولبس ملابسة بسرعة وراح المدرسة ... مثل كل يوم..." متاخر" !!! ؟؟؟
لكن المعني هل ممكن حلم يغير انسان .... هل يغير سلوكه ... هذا السؤال ؟؟؟
لان جرس الحياة بدا يضرب عنده .. وكان هذا تنبيه له ... كيف ممكن يغير حياته ....!!!
وكيف ممكن انت تغير حياتك !!! هذا السؤال ..؟؟
هذا ليس من نسج الخيال ,,,
الإثنين مارس 28, 2011 10:59 pm
